Finantza etikoen eta ekonomia sozialaren ekosistema zorioneko dago. SpainCap elkarteak “Inpaktu Eragiketa Onenaren” saria eman du, Koiki ETE sozialean egindako inbertsio estrategikoagatik eta EGEF Ekintzailetzarako eta gizarte-eraginerako funtsaren izapideagatik. Aintzatespen horrek inpaktu soziala duen aliantza publiko-pribatuaren eredua nabarmentzen du. Fiare Banca Eticak parte hartu du eredu horretan, Bizkaiko Foru Aldundiarekin batera.
Koiki mezularitza jasangarri eta inklusiboan aritzen den enpresa sozial bat da. Zaurgarritasun-egoeran dauden edo desgaitasunen bat duten pertsonentzako enplegua sortzen du, eta, aldi berean, CO₂ emisioak murrizten ditu, «azken milia» ekimena sustatzen baitu, banaketak oinez edo ibilgailu jasangarrietan eginez.
EGEF funtsa Bizkaiko Foru Aldundiak sortu du Seed Capital Bizkaiaren bitartez, eta administrazio publiko batek Europan sustatzen duen lehen inpaktu-inbertsioko funtsa da. Besteak beste, Fiare Banca Eticaren babesa du, eta ekonomikoki bideragarriak izateaz gain, gizartean edo ingurumenean inpaktu positiboa eta neurgarria sortzen duten enpresa-proiektuak babestea du helburu.
Gizarteratzeko finantza-tresnak
Fiare Banca Eticaren ustez, sari horrek egiaztatzen du posible —eta beharrezkoa— dela finantza-tresnak sortzea, kapitala gizarte-eraldaketaren eta laneratzearen zerbitzura jartzeko.
Fiarek EGEF funtsean parte hartzeak erakusten du kredituak eta inpaktu errealeko irizpideekin egindako inbertsioak pertsonen bizitza eralda dezaketela eta komunitatearentzat itzulkin positiboak sor ditzaketela.
Arlo publikoarekiko aliantza: inpaktua biderkatzea
Saritutako eragiketa horren alderdirik baliotsuenetako bat alderdi hauen arteko lankidetza da: ekonomia sozial eta solidarioko erakundeak, hala nola Fiare Banca Etica; inpaktu-inbertitzaileak; eta erreferentziazko administrazio publikoak, esaterako, Bizkaiko Foru Aldundia.
Lankidetza publiko-pribatu horrek erakusten du erakundeak banku etikoarekin bat egin dezakeela enpleguko, inklusioko eta trantsizio ekologikoko politika publikoen irismena zabaltzeko, eta Bizkaiko lurraldea berrikuntzako eta inpaktu-inbertsioko Europako erreferente bihurtzeko.
Koiki eta ekonomia sozialaren etorkizunari buruz
Jasotako bultzada finantzario eta estrategikoari esker, Koikik banaketarako zentro komunitarioen sarea sendotzen jarraitzen du, lan-merkatuan sartzeko zailtasunak dituzten kolektiboentzako enplegu duina sortuz eta hiri-logistika deskarbonizatuz.
Pertsonak eta ingurumena finantza-jardueraren erdigunean jartzen dituzten proiektuak bultzatzen jarraitzeko konpromisoa berresten dugu.
Argazkien egileak:
- Diputación Foral de Bizkaia (Uztailaren 16a, 2026)