Propaganda pel Fet!  non naceu para encaixar na industria, senón para cuestionala. Esta discográfica independente catalá, que á súa vez é oficina de contratación de directos e tamén xestiona dereitos da propiedade intelectual, leva décadas apostando por proxectos que non responden á lóxica comercial nin buscan o éxito efémero do algoritmo. O seu obxectivo sempre foi o mesmo: facer cultura con sentido, identidade e discurso propio. E facelo acompañando ós artistas de xeito mutual e cunha transparencia á que a industria musical é habitualmente allea.

Unha traxectoria dentro da cultura independente

Nun mercado musical que tende a priorizar os éxitos inmediatos e virais, a Propaganda pel Fet! caracterízaa unha traxectoria baseada na constancia e na vontade de construír un proxecto a longo prazo, con rigor, atención ao detalle e coherencia cultural. O seu recorrido, ao longo de xa 30 anos, non se mide en indicadores de popularidade dixital (aínda que os ten), senón na consolidación dunha rede estreitamente vinculada ao territorio (ao longo e ancho do globo), á lingua, aos movementos sociais, á transparencia e a un acompañamento artístico que pon ós creadores no centro e pon ao seu servizo o know-how acumulado pola cooperativa.

Ao longo da súa historia, acompañaron propostas musicais que entenden a cultura como unha ferramenta de expresión colectiva, de transformación social e máis alá de cada particularidade individual para xerar un espazo de construción de imaxinarios compartidos.

Desde a súa fundación en 1996, o selo actuou como plataforma para decenas de formacións que se converteron en referentes da música popular e de carácter combativo. Entre elas destacan Obrint Pas, Smoking Souls, Auxili, Marala, ZOO, Ovidi4, Pirat’s Sound Sistema, La Raíz, Dr. Calypso, La Carrau, Feliu Ventura, Maio, KOP, At Versaris, Ràbia Positiva e moitas outras.

Na actualidade, o catálogo amplíase con proxectos como Lia Kali, Svetlana, Xavi Sarrià, Tribade, Elane, DJ Trapella, Boom Boom Fighters & Cookah P, Groggy Rude e Llengua Morta…

A música como ferramenta social e comunitaria

No contexto actual de hiperconectividade mediada por plataformas e dispositivos móbiles, a música non queda nos auriculares. Máis alá da necesidade económica de vertebrar un proxecto cunha área dedicada á contratación de concertos, en Propaganda pel Fet! apóstase pola música en directo como contrapartida necesaria para a música gravada: é nos escenarios e nas pistas de baile onde a música nos permite conectar e xerar comunidade, arredor da música e de moitas cousas máis.

Nun momento no que todo tende a individualizarse, iniciativas como esta seguen apostando polo colectivo, reforzando vínculos e dando lugar a formas de participación máis vivas.

Como o financiamento ético impulsa estas iniciativas

O reto non é só acompañar estes proxectos desde o seu nacemento e inserilos nas lóxicas dun mercado difícil, senón facelos viables e sostelos no tempo mantendo as súas constantes vitais ancoradas na independencia e nos valores da economía social e solidaria. A banca convencional non apostou nunca por este tipo de cultura, xa que estas iniciativas non encaixan nunha lóxica baseada unicamente na rendibilidade financeira inmediata.

Isto deixa fóra proxectos que xeran un valor cultural e social incalculable. Fronte a isto, a banca ética introduce outra mirada, onde o impacto tamén conta. Grazas a este enfoque, Propaganda pel Fet! pode desenvolverse sen depender exclusivamente das dinámicas do mercado financeiro e fai máis rico e diverso o ecosistema cultural.

Cultura, comunidade e transformación

Propaganda pel Fet! forma parte desa cultura que constrúe, xera comunidade e mantén vivas formas de facer afastadas do masivo. A súa existencia é o resultado de decisións económicas con propósito, de elixir que proxectos deben seguir adiante máis alá da rendibilidade económica. Porque cando cambia a forma de financiar, a cultura gaña espazo e voz.