Que pasa cando a finanza ética se atopa coa soberanía alimentaria no barrio? Pasa que as ideas se converten en proxectos tanxibles, habitables e transformadores. “Hai uns días, un grupo de socios e socias de Fiare Banca Etica tivemos a oportunidade de visitar Foodcoop, o supermercado cooperativo e participativo de Barcelona, para coñecermos de preto como se xestiona a alternativa ao modelo de consumo masivo.

Esta visita non foi unha casualidade. Tanto Fiare coma Foodcoop compartimos unha mesma raíz: a convicción de que a economía debe estar ao servizo das persoas e do planeta. Se cos nosos aforros decidimos que mundo financiamos, coa nosa cesta da compra decidimos que modelo de produción apoiamos.

Moito máis que encher a despensa: valores no carro da compra

Pasear polos corredores de Foodcoop é entender que outra forma de consumir non só é posible, senón que xa é unha realidade a través de criterios rigorosos que poñen a vida no centro. O proxecto prioriza os alimentos ecolóxicos, de proximidade e de tempada, cultivados de forma respectuosa coa terra para reducir drasticamente as emisións do transporte e apoiar o campesiñado local, asumindo con naturalidade que se non é a época dun produto, simplemente se espera ao seu ciclo natural.

Así mesmo, a loita contra a crise do plástico é un dos seus piares fundamentais grazas a unha gran sección de compra a granel que permite adquirir só o necesario, evitando o desperdicio alimentario e de envases. 

Esta sensibilidade esténdese á inclusividade alimentaria, reflectindo a diversidade das persoas nuns andeis cunha oferta coidada de produtos sen glute e opcións veganas para que todo o mundo se abasteza de forma segura e ética.

Todo iso sostense baixo un modelo que rompe o mito de que “o eco é un luxo”, logrando unha accesibilidade económica con prezos xustos para as consumidoras sen espremer os produtores, ao mesmo tempo que garante condicións laborais dignas e un funcionamento baseado na implicación das propias socias, que dedican unhas horas ao mes ás tarefas do súper.

Unha rede de empresas que comparten o ADN

O que fai forte a Foodcoop non é só o que vende, senón con quen se alía, tecendo unha rede con empresas e colectivos da economía social e solidaria que comparten o mesmo ADN e que a miúdo tamén están VINCULADOS ao ecosistema de Fiare.

No ámbito da loxística e a repartición cooperativa, traballan con Mensakas e Mercedes para asegurar unha mobilidade sustentable que respecte os dereitos laborais. Para que o propio funcionamento do local sexa coherente, confíanlles as subministracións de enerxía limpa e telecomunicacións a Som Energia e Som Conexió, mentres que as súas alianzas con colectivos como Iridia e Zumzeig reforzan o seu compromiso cultural e de defensa dos dereitos sociais no territorio.

Sumando forzas na Rede de Supermercados Cooperativos

Foodcoop forma parte dunha rede de supermercados cooperativos en pleno crecemento que está intentando competir coas grandes cadeas de distribución.

Para as persoas que formamos parte de Fiare Banca Etica, ver como os recursos económicos se materializan en proxectos coma este é o mellor recordatorio de por que facemos o que facemos. Cooperar é a mellor ferramenta que temos para deseñar o futuro.

Outras noticias de interese: 

Os supermercados cooperativos irrompen con forza

La Osa: supermercado colaborativo